28 April 2007

وحدة


بقالى فترة طويييييييييلة شاغلانى فكرة العيشة من غير هدف أو فقدان الهدف أو التنازل عنه لأى سبب من الأسباب
فيه حاجات كتير أحياناً ببقى عايزه أغيرها أو أتنازل عنها أو أبعد عنها
و أرجع أتراجع لمجرد عدم قدرتى على تخيل الحياة من غيرها و حالة الفراغ العمييييقة اللى ها أعانى منها
إكتشفت قريب قووى إن الواحد ممكن يفضل معلق نفسه بحاجات أو ناس أو أراء أو أفكار لمجرد الخوف من الوحدة
من بعدهم
أو يمكن خوف من التغيير فى حد ذاته
خايفة قوى من اليوم اللى ها أخلص فيه الكلية .. مش عارفة شكل الأيام ممكن يبقى إزاى
لو كلها بقت شبه بعضها و كلها مالهاش معنى
خايفة من الوحدة و الفراغ اللى ها أبقى فيهم لو ما إشتغلتش
مش بس فكرة التخرج و طوى صفحة الدراسة هى اللى قلقانى .. إنما فكرة طوى أى صفحة عموماً رعبانى
حبيت قوى فكرة الهدف ... إن الواحد يبقى وراه حاجة يعملها بكرة و بعده و بعده
إن يبقى فيه خطة أمشى عليها .. إن يبقى فيه حاجة أصحى عشانها... مش حباً فى المذاكرة
إنما زى ما قلت أنا بتكلم عن الفكرة عموماً .. فكرة الحياه من أجل أشياء ثم المفاجأة بإنتهائها
أو ضياعها من إيدينا اللى أحياناً كتير بيجى فجأة و من غير ما الواحد يبقى مستعد للفراغ المعنوى
اللى ها يعيشوا من غير الحاجات ديه
مش عارفة أنا صح و لا لأ بس أحياناً كتيييييير بفضل جوة قصص لمجرد إنى أبقى عايشة عشان حاجة
أحياناً كتير بيبقى فيه خطط أو مشاريع فى دماغى و أعملهم واحدة واحدة عشان ما أخلصش كل المتعة مرة واحدة
بظبط زى ما أكون فى صحراء و معاية إزازة مياه و احدة
و عطشااااانة جداً بس أشرب بق واحد عشان أسيب شوية لبعدين
إيه معنى الحياه لو عشت أعمل خطط و تخلص ... أو تنتهى نهاية مأساويه
إيه إحساس حد فضل لفترة طويلة قوى يخطط لمستقبله مع حد مثلاً
و بعدين إتفاجأ إن كل الخطط ديه مش ها تتحقق لموت الشخص ده أو إستنداله أو يمكن لظروف خارجة عن إرادة الإتنين
إيه إحساس واحدة بتحلم طوووول عمرها بطفل تشبع فيه غريزتها
و تتفاجأ بعدم قدرتها على تحقيق الحلم ده
أيه إحساس حد فقد أهله أو أمه و بقى مش مستنى عيد الأم عشان يجيب لأمه هدية تعبر عن مشاعره ليها
إيه إحساس الوحد و الفراغ
ماله سخيف قوى كدة و قاتل و مؤلم
مش متأكدة إن إحساسى ده ممكن يوصل
بس هو نوع من أنواع الخوف على كل حاجة لىّ
أحياناً بيبقى كل اللى بيمتلكه الواحد حاجات قليلة قوى
ف ما بيبقاش عنده أى إستعداد يفقد حاجة منهم
و أحياناً بيبقى كل اللى بيتمناه حاجات صغيرة قوى
ف مافيش مجال إن حاجة منهم ما تتحققش

sorry for not replying on the comments i receive but
that's because i'm really busy these days but i will reply on it soon

23 comments:

كلام لوجيك said...

مش عارف أقولك ايه يا يارا المرادي
بس انتى قولتى اللى كتير مننا كان عاوز يقوله

الهاجس من المستقبل
والخوف من التغيير ... حتى لو للاحسن
بس عجبتنى لمحة الفلسفة اللى فكلامك
عندك تطور جميل فى كتابتك

يمكن اعلق تانى لو لقيت كلام أقوله

دمتى بكل خير

yara said...

أيه يا أسامة مش لاقى كلام ليه؟؟
هو البوست ده برضة فى الدايرة السوداء اللى ما بتعجبكش؟

كلام لوجيك said...

العفو يا فندم
دايرة سوداء ايه بس
كلامك موزون وواقعى
بس هى دي الحاجات اللى كانت شاغاة بالى ولا زالت من فترة طويلة جدا
يمكن عشان انا من النوع الكلاسيكى القديم اللى بيحسب كل خطوة وبيكره اي ريسك

على العموم
للحديث بقية
تصبحى على خير

الربان said...

تحياتي

التغيير يتضمن المجهول ، و هذا سر خوفنامنه كبشر.... لكنه أيضا، أي التغيير ، سنة الحياه.

و صدقيني الحياة من غير قلق و ترقب و تحفز ممله... طبعا في حدود المعقول و ليس الشيء الذي يزيد عن حده.

نحن محظوظون لاننا نعيش الحياة و علينا ان ننعم بها ضمن ضوابط الدين .

تحياتي و استمتعي بحياتك لانك عيشاها بالفعل.

micheal said...

يارا
بجد ده أكتر بوست أنتي كتبتيه تأثرتبه جدا و ذلك لانكي تكتبين هذا البوست و كأنك تحكين قصتي المأساويه و ما حدث لي عقب التخرج من فشل في وظيفتين و من بعدها الجلوس في المنزل عاطلا بلا هدف و لا طعم و لا لون للحياه حتي أصبحت أيامي كلها ممله و بلا طعم حقيقي
يارا...أنا بجد أسف للكلام النكدي اللي أنا كتبه بس مش عارف ليه حسيت أني عاوز أفضفص بالكتابه
أتمني لكي النجاح بعد الانتهاء من فتره الكليه و أن تنجي في التخطيط لحياتك حتي تتجنبي مشكلتي
تحياتي لكي و أسف علي النكد مره تانيه

Anonymous said...

ماشي يا ستي بوست تأديت واجب زي بتاع الموظفين في الجرايد القومية
انتي امكانيتك اكتر من كده ووقت ما قلتي الفكرة قلتيها احلا من كده يمكن يكون العيب مني بس انا حسيت بأنه محدود اكتر من اللازم سوري يا يارا

محمد عبد الغفار said...

أحساس لم اجربه

yara said...

كلام لوجيك:
و إنت من أهل الخير
و كويس إن البوست عاجبك
أنا كمان بكره الريسك بس مش دايماً و مش فى كل الحالات


الربان:
ما أنا عايشاها بس مش مبسوطة بيها أوى ..أحياناً كتير بحس إنى مخنوقة و عايزة أبطل أعرف كل الناس اللى بعرفهم

Micheal:
مافيش نكد ولا حاجة أو يمكن ده العادى بقى يا مايكل المهم يلا نخرج من العادى لل لا عادى و نتفاؤل شويه و إنشاء الله تتغير ظروفك قريب

كبير المتشردين:
الصداقة ما توصلش لكدة؟ لدرجة إنك تقدر تعرف كا اللى جوايا من مجرد كلام تقراه
أول مرة أعرف إنك فاهمنى قوى كدة


Mohamed A. Ghaffar:
ليه بقى ؟؟و إزاى؟؟

micheal said...

يارا
و الله عندك حق...أنتي باين عليكي فيكي شيء لله..ههههه...تصدقي انا بجد جالي انترفيو يوم الاربعاء..ادعيلي عشان الموضوع يخلص علي خير لانه بجد حيفرق معايا كتيييير
عاوز أقولك يا يارا أنك يا ريت بجد تحاولي تطردي الاحساس ده من جواكي لان صدقيني ساعات لما الواحد بسيطر عليه احساس زي ده بيلقيه بيقوده للفشل دون أن يدري
باذن الله ناجحه دايما والي الامام
تحياتي لكي و السلام أمانه لمني و سمر

Pia Sinacento said...

PORQUE NO USAN LETRAS NORMALES!

SomeOne said...

:(
:(
:(
انا زعلان على فكرة

yara said...

Micheal:
مبررررررررررررروك بقى
ديه نتيجة دعواتى
يلا أبقى قولى عملت إيه فى الإنترفيو

Pai:
sorry i didn't get your words as i don't even know the language.. will be better if you resend it again in English
anyway you are more than welcomed on my blog

Shadi:
شادى شادى شادى
مالك بقى زعلان ليه؟؟
أنا عملتلك حاجة؟؟
على العموم ماتزعلش ما أقدرش على زعلك :)

SomeOne said...

طب انا غايب عن التدوين
ومش بعلق عند اي حد خالص

طب وانت؟؟

yara said...

ولاهى أنا كان غايبة عن كل حد برضه.. و حتى ما كنتش برد على اللى بيعلقوا عندى عشان مشغوووولة موت بس قريت البوستات بتاعتك و ها أعلق و أقولك رأيى
ما تزعلش
:)

SomeOne said...

لا انا شوفتك معلقة في مدونات

فكرت في حاجة؟؟

SomeOne said...

عموما انا مش حقرا البوست ده

:P

حقراه بكره ان شاء الله
:)

غلاسة بقى

:)

سلام

yara said...

مدونات مين بقى إنشاء الله؟؟
و بعدين ها أفهمك القصة
لما حد جديد بيجى يعلق عندى بحب أدخل أشوف الباوج بتاعه و ساعات بعلق لو البوست عاجبنى بس إنت يا شادى مننا و علينا يعنى مش ها تزعل منى المفروض أصل أنا طلعان عينى فى المشروع.. و ما فيش أى حاجة خالص ..ها أقرفك من هما و رايح تعليقات

yara said...

طيب يا غلس بس أبقى إقراه بكرة ما تنساش

micheal said...

أنا لسه راجع من حوالي ساعه و نص...كالعاده يا يارا موضوع التسويف..الله أعلم ايه اللي حيجري المرخ دي و هل حيختلف عن كل مره و لا متعوده داييييييما
:)
أنا قلت أطمنك
تحياتي لكي و للجميع

yara said...

لا إنشاء الله ها يتم الموضوع ده بس إنت أصبر و ربنا معاك

Anonymous said...

الله
كانك عارفة اللى انا بافكر فيه
فعلا نفس الاحاسيس والافكار دى انا فكرت فيها فى يوم من الايام
بس لسه متوصلتش لحل
لو عرفتى الحل ابقى قولى
اه من الحق زورى مدونتى
walidphoto.wordpress.com

Anonymous said...

انا بقالى 10 دقايق ماكس الكيبورد و مش عارف ابتدى ازاى
انا اول مرة اشوف البلوج ده دلوقتى و بصراحة عاجبنى جدا بس ماكنتش ناوى ارد خالص لحد ما قريت الجزء ده انا عارف ان تاريخه عدى عليه سنة و 26 يوم بس فعلا انا حافظ الاحساس ده يمكن اكون عايش فيه فى اللحظة اللى قبل ماكتب الرد ده بثانية واحدة انما مجرد وجود حد عارف ايه اللى انت حاسس بيه حتى لو كان الاحساس ده من زمان و يمكن يكون اتغير بس انا هرضى حتى باقل من المشاركة

yara said...

Anonymous:
يمكن فى حاجات كتييييير قوى إتغيرت السنة اللى فاتت ديه بس هايفضل إحساس التمسك بأشياء لمجرد عدم الرغبة فى إحساس الفراغ اللى بعدها