14 March 2007

مشهد


مش فاكرة كنت فى تانية ثانوى و لا تالتة ثانوى لما مريت ب لحظة معرفتش أنساها لغاية إنهاردة ..و متهيألى مش ها أعرف أنساها عمرى... كان يوم عادى جداً مش فاكرة كنت فى الشارع ليه فى عز الضهر و ماشية لوحدى ..برضه مش فاكرة كنت راحة فين ..مش بقولوكوا اليوم كان عادى قوى و أحداثه عادية جداً ما تستحقش إنى أفتكرها عشان كدة كان ممكن جداً يمر اليوم ده زيه زى غيره من غير ما افتكره و لا أرجع أتكلم عنه تانى... لولا الموقف اللى مريت بيه يومها ...واحد عدّى جانبى بعجلة ماشى ببطىء و براحة قوووووووى و كإنه ماشى على أعز ما يملك.. إستغربت البطئ و الحرص اللى هو ماشى بيهم أتاريه رابط فى العجلة من ورا بتاع عشر كراتين بيض فوق بعض و خايف عليهم زى عنيه.. لأ و بيسوق العجلة ب إيد و الإيد التانية مرجعها ورا ضهره و سانده على الكراتين... أحلف على المصحف إنه كان متأكد إن إيده اللى ساندها على البيض ديه و جودها زى عدمها و إن الحركة ما تزيدش عن حركة تلقائية عملها ناجمة عن خوفه و حرصه على الكراتين و كل شويّة يلّوح راسه و يبص بصة على البيض ....كانت محاولة مالهاش معنى بس تستحق الإحترام لدرجة إن قلقه و خوفه و حرصه إتناقالولى و بقيت عايزة أقوله ماتخافش مش ها يحصل حاجة إنشاء الله ..و فى نفس اللحظة ديه كان هو داخل شارع جانبى و هو بيحود العجلة مالت منه و فقد توازنة بس موقعش ..هو كان كويس بس العشر كراتين بيض إتنقلوا من فوق العجلة للأرض عاملين مجزرة على الأرض ... ف كان أول رد فعل لىّ و أنا واقفة بعيد بتابع الحدث شهقة قوية جداّ و حزن و حصرة ..أما هو ف كان رده إنه نزل رجل من على الدواسة و سندها على الأرض و لوح راسه تانى و بص على البيض نظرات طويلة ماعرفش ليه إتهيألى عدت عليه سنة و ركن العجلة و نزل من عليها و عنيه لسة على البيض و إيديه الإتنين إترفعوا و إستقروا فوق راسه تفكيره مشلول مش عارف يعمل إيه كنت متأكدة إن فيه مليون فكرة عدت فى دماغه فى اللحظة ديه... فكر فى أهله ..و شغله..و صاحب المحل اللى أكيد باعته بالكراتين ديه فى حتة ..و فى البلاوى اللى مستنياه مش عارف.. يعمل إيه و لا يفكر إزاى ..يلم البيض السليم و لا يسيبه و لا يعمل إيه و أنا كمان كنت بشاركه أحاسيسة مليون برضه فكرة جت فى دماغى أساعده فى لم البيض.. و لا أواسيه بكلمتين ..و لا أديله فلوس.. و لا أروح معاه لصاحب المحل و أديله هو الفلوس و أقوله ما يعملش للولد حاجة و ما يقطعش رزقه... مليون فكرة و الوقت قليل المهم من كل حيرتى ديه طلعت بقرار ...و روحت واخدة بعضى وماشةهو ده كل اللى أنا قدرت أعمله... مشيت ...من غير ما أنطق ب ولا كلمة و لا حتى قلتله فداك ماتزعلش نفسك

مشييييييييييت




بعد كام سنة إتكرر مشهد مشابه و أنا نازلة من البيت لقيت راجل كبير فى السن عجووووووز قوى


و كان أسمر قوى مش فاكرة ليه فاكرة ملامحه لغاية دلوقتى بوضوح المهم كان عمال يعيط بحرقة غريبة و كإنه فقد كل حاجة ليه فى الدنيا و لقى نفسه لوحده فجأة بيعيط بصوت عالى و بشحتفة و بيقول كلام مش واضح ..أصلاً مش مسموع ..فكرت بينى و بين نفسى إيه اللى ممكن يخليه يوصل لحالة الإنهيار ديه.. فى السن ده.. إيه هى الصدمة اللى لسة مصدومها بعد العمر ده كله ..إيه اللى يستاهل و كنت عايزة أروح أسأله و أكلمه و أخد بخطره و فعلاً قربت منه بس قبل ما أوصله نفس الموقف إتكرر تانى

نفس حالة الجبن و الخوف من مواجهة الناس فى لحظات آلامهم

مش عارفة ليه بعمل كدة... ليه بحس إنى مش قادرة أشاركهم أحزانهم و همومهم.. ليه بعجز عن مواساة أقرب الناس لىّ ..ببقى عايزة أعمل كدة بس ما بقدرش ..عمرى ما عرفت أحول إهتمامى و تأثرى بأحزان الناس و معاناتهم لرد فعل حقيقى دايماً بكتفى إنى أفضل جنب الحد ده من غير ما أنطق ولا كلمة عمرى ما حضنت صاحبتى و هى بتعيط و لا طبطبت عليها بالعكس بحط راسى فى الأرض و أكتفى باللزقة جانبهم و لسانى محشور جوة بقى و أتخرس و أتكتم كتمة مش مفهومة و لو حاولت أتكلم بلاقى صوتى متحشرج و مش راضى يطلع و أفضل أتمتم كدة بكلمات مالهاش معنى و غالباً ما بتبقاش مفيدة

27 comments:

Egyptos said...

إزيك يا باشمهندسة
أخيرا شفت تعليقك الأخير عندى؛ و متشكر قوى
بخصوص رد فعلك؛ كفاية إحساسك العالى و تعاطفك مع الناس؛ و أعتقد إنك من كتر الحساسية و الإحساس بالمشكلة؛ بيكون رد فعلك قاصر من وجهة نظر؛ لكن تأكدى إن مجرد الشعور الطيب و التعاطف دا كفاية؛ لأن فيه ناس متبلدة أو قساة القلب متعرفش حتى التعاطف ده

كلام لوجيك said...

شوفى يا يارا
فى ناس بتكون قمة الاحساس والمشاعر والتعاطف
وبتحمل موده وحرص بالغين للانسان اللى بتتعامل معاه
لكن بتكون مشاعرهم بتكون محبوسه جواهم
بيكون عندهم نوع الحواجز الداخليه اللى بتمنعهم من التعبير عن مشاعرهم الجميله امام الشخص الاخر
وتصرفاتهم الفعليه هى اللى بتكون ترجمة لمشاعرهم الحبيسه
يعنى لما صديق يقع فى مشكلة معينه
بيلاقى صديقه بيسانده ويقف معاه وبيدخل فى قلب العاصفه
من غير ما يطبطب عليه او يعيط معاه
دي نوعية من الناس

يعنى مش شرط دائما ان يكون مكنوننا الداخلى مترجم على تعابير وجوهنا فى بعض الحالات
وانا واثق انك لو جاتلك الفرصه ولقيتى ان ممكن يكون فى ايدك حاجه تعمليها
عمرك ما هتتأخري ابدا
وهتقومى بدورك على اكمل وجه

بس على فكرة التعاطف لوحده مش كفايه
وده فى بعض الحالات مش كلها
وختاما
ماتزعليش من نفسك قوي كده
انت مليانه احاسيس طيبه ومشاعر ايجابية كتير تجاه الاخرين
والدليل على ذلك ، كتابتك لهذا البوست الرائع
لكن يجب ان توظفى مشاعرك فى الطريق الصحيح
وان تبعديها عن الناحية السلبيه حتى يحس بها الاخرون

خالص تحياتى اختى العزيزة
ودمتى دائما بكل خير

SomeOne said...

الكلام لو كان يعبر ع الحنان
كنت اقول اني بحبك من زمان
-------------------
اكيد اصحابك والمقربين عارفين كويس حبك ليهم
ومش مستنين منك كلام يعبر عن حبك
----------------------
اما التعاطف مع الناس عموما
ف اصلا شيء كويس انك بتتعاطفي معاهم من داخلك
في مجتمع لا يتعاطف اصلا

وده بداية الايجابية
اكيد حيجي اليوم ونجدي نفسك تتخذي خطوات ايجابية

---------------
سلاماتي و احتراماتي

micheal said...

مممكن جدا يا يارا تكوني من النوع اللي مش بيعرف يعبر عن مشاعرة بطريقه و اضحه و لكن تأكدي ان في داخلك مشاعر نبيله و رقيقه و مين عارف..مش يمكن يجي اليوم اللي تقدري تعبري عن مشاعرك بشكل واضح و مباشر و صدقيني لو جاءتك الفرصه المواتيه بعد ذلك ستجدين نفسك الطيبه تدفعك لاتخاذ الموقف المناسب في وقتها
تحياتي لكي

Anonymous said...

i know we agread not to refer to our personal informations about each other but sorry i wanne do it:)
its something about all of us in this family we have so many feelings but we would rather die be4 we share it and if some one did it must be a disaster going on like our grandmother is dead or something like that.....we have no affection...we feal people and we feal each other but never make it show.i cant say we are sorry though we may feal it,we cant say to our moms or sisters or cousines or even friends that we love them and we r always there 4them and its ok between us coz we know each other but 4 some people we r kind of wierd.these confused reactions i make when something emotinal happens on sudden make feal i am stupid.and i am only afraid that it will come a time i ll regret that i didnt say my fealings to someone after its too late,so am gonne say it now:girls i really love u and cant imagine my life without u in it esp u yara u r rally my soul mate ,by the way i am writing in english coz of z same thing i cant share my fealings in arabic and god only knows why!!!

Anonymous said...

انا رديت علي بوست الاخوان رد كبير اوووي بس يا خسارة شكل البلوج بتاعك مش عاجبه اسمي مش مهم اقدر اقولك يا يارا بجد ان بوستاتك بقيت حكاية كملي بقا بس مش علي حساب المزاكرة

كلام لوجيك said...

مساء شريف
ازيك يا يارا
انتى مختفيه فين بقالك فترة؟؟
على العموم عاوز اقولك لا تقسى على نفسك
ولا تحملى نفسك اكثر من طاقتها

ومنتظرين ردودك

vetrinary said...

انتى اخترتى تخشى القصيده ف اخر سطر
وانا اخترت
تكون القصيده
سطر واحد

حلوة المدونه

vetrinary said...

اسف انى رجعت تانى
بجد المدونه جميله يا بشمهندسه....ا
عجبنى اوى انك رافضه المساواه
جميل ان الواحد يلاقى بنت مثقفه عارفه قيمه الراجل
وتكون واثقه اننا فعلا اجدع من البنات
هههههههههههههههه
اكيد
انتى فى جامعه ايه

Anonymous said...

Dear yara,

I think that you are not the only person who can not express her or his fellings to the other people, i have it also, specially if someone very ill or something like that. i think it has also to do with the way we are growing up, in my family it was not a normal matter to cry or to show your emotion. when i studied for a social worker in holland i have learnd to show my feelings to the other people when they have a problem. It very important to show the people taht you understand what they feel in bad situation, for them it it helps when they hear that they are understandbal, but i stil find it diffecult sometimes , sometimes words can not say what i feel, or i can not finde the suitbale words.


Sherif

yara said...

مش عارفة أرد أقول إيه فعلاً كل مدى بكتشف إيجابيات جديدة للتدوين كفاية حالة الدعم المعنوى اللى عملتهوالى فعلاً فرقت معايا كتير يمكن مش فى الموضوع ده بذات بس فرق معايا فعلاً إنى أحس
بوجود ناس حواليا بيحاولوا يساعدوا و لو حتى بمجرد كلمات تعبر فعلاً عن إن دايرة المعارف اللى عملتها من مدونتى ديه أحلى حاجة حصلتلى و بجد سعيدة و فخورة فعلاً بالمعرفة ديه و بالصداقات و الاخوة اللى كونتها

أسامة(my brother and my wisdome voice):
أنا مش بحاول أقسى على نفسى عشان أنا فعلاً مصدقة إن ديه حاجة مش ب إيدى إنى مبعرفش أعبر عن اللى جوايا و أحياناً كتيير بندم على لحظات عدت كنت ساكتة فيها و ماكنش ينفع أبداً إنى أسكت هو بس كان نوع من أنواع المشاركة أو بمعنى أدق
بعرض إحدى سلبياتى فى محاولة منى لتجنبها أو تفاديها فيما بعد أو يمكن كانت محاولة مثيرة للشفقة لمجرد الحصول على دعم معنوى خلال وقت أنا فعلاً بتمنى يعدى علىّ على خير عشان لأول مرة فى حياتى أحس إنى محتاجة لناس حواليا

macamico:
all i can tell is that i really love you so much too and i love the girls you were talking about although there is someone always suspect on my feelings towards her
but i will take this place to tell her that i love her
and the stupid issues between us we should move on and let go
and i love our stupid frined
do u know her macamico??

كبير المتشردين : ما تخافش المذاكرة تمام الحمدلله و مش ها تعطل إنشاء الله أنا مش من النوع اللى بيذاكر طول الوقت و إنت عارف بس إنت بس اللى محبكها شوية

vetrinary:
ميرسيييييييى جداً و سعيدة برأيك فى المدونة و أنا هندسة الزقازيق
أحب بس أوضحلك إنى ماكنتش قاصدة إنى أعرض القضية الأساسية من البوست فى أخر كام سطر عشان ماكانش ده المقصود من البوست أنا بس كنت ناوية أحكى عن المواقف ديه بس الكلام جاب بعضه من غير ما أحس


Shreif, Micheal and Shadi:
بجد سعيدة بمعرفتكوا و أتمنى نتفضل تعرف بعض على طول

Anonymous said...

Dear yara i am also happ to know you, micheal and shadi, i like to know you fo ever and i want to know you much beter, we have the time for , i shall let you know when i come to Egypt


sherif

yara said...

أسامة:
ليه مسحت الكومنت ؟
كنت كاتب فيه إيه ها أموت و أعرف

Egyptos:
نسيت أشكرك على الكومنت بس إنت فين ما بتكتبش حاجة جديدة ليه؟ من العيد و إنت مختفى

abderrahman said...

عادي يا يارا.. مش تلومي نفسك
انا كتير بكون كده
لإن الأفعال وردود الافعال حاليا بقت مش طبيعية.. واحيانا الواحد مش بيحب يغامر
بس حاولي تكسري الحاجز ده.
لإن ده هينعكس على مسالة مواجهة الناس عموما.

وده عن تجربة

كلام لوجيك said...

انا كنت فتحت صفحة الكومنت وانا فى الشغل عشان اكتبلك
وبعدين جالى عينة واتلخمت فيها
وبعد ما خلصت رجعت تانى اكمل الكومنت
وبعد ما نشرته
اتفاجئت بيكى نزلتى تعليقاتك على الردود فى نفس اللحظه اللى كنت انا بكتبلك فيها
واكتشفت ان كلامى فى الكومنت مالوش لازمة وانه اصبح بايت بلا طعم
فقمت بحذفه فى نفس اللحظة

طبعا انا عاوز اشكرك جدا على تقديمك الجميل لإسمى
واعتز جدا بيه

انا كنت اقولك على حاجات كتير لكن تعليقك سد ردودك سدت عليا الطريق
واهم حاجه انك انك عارفة سلبياتك عشان تقدري تتعاملى معاها وتتفاديها او تعالجيها
لإن المشكلة الكبيرة عند اي شخص .. انه مايكونش عارف فين او ايه عيوبه وبالتالى فلا يعرف علاجها
وانتى والحمد لله مفيش عندك عيب او مشكلة
مجرد قصور فى توصيل احساسك الى احبائك عبر القنوات الطبيعية

حاجه اخيرة عاوز اقولها
انا بختلف مع الاخ والصديق شادي فى موضوع التعاطف
هو بيقول ان التعاطف فى حد ذاته كفاية
وانا بقول ان التعاطف لوحده مش كفاية
ليه؟؟
لإن التعاطف بدون فعل عملى زي عدم التعاطف او التجاهل بالظبط
فما فائدة التعاطف اذن اذا كان غير مصحوب بتفاعل عملى مع الحدث

ارجو الا تفهميننى خطأ
فأنا لا اتهمك بالقصور
فأنا اعلم تماما ان الفرصة لم تأتكى لكى تقومى بما يجب ان تقومى به

ارجو ان يكون كلامى لوجيك

خالص تحياتى
ودمتى دائما بكل خير

el2ahwagi said...

enti ya Yara lamma betkooni za3lana awi betfadali tkooni lwa7dik?. mosh 2asdi belzabt lwa7dik ... bas betfaddali en elli ganbik sa3aat yewaffar kalamo l nafso ...?

da mogarad takhmeen ...

ana 3ala fekra zayik ... lamma bakoon ma3 7ad beyet2alem elkalam beyehrab menni ...

fi naas keteer keda law masha3erhom zadet 7edetha awi beteb2a masha3erhom aktar mn en ay kalemaat te3abar 3anha fayeb2a elkalam maloosh lazma la2ano haykoon soora mamsookha leli 7aseen beeh webadal mat3abar 3anenna tewasalo betaree2a sat7eya welnateega en el7ala di tekhresna ...

bas fel moqabel ana momken a3mel 7aga ... fe3l baseet yetala3 eli7saas da bedon matkalem ...

sawa2 f kelma maktooba ...
aw fi tasarof walaw baseet ...

3amal nesaa3ed beeh elnaas aw newasal i7sasna beehom ...

3ala fekra beybaan welnaas bet7es ...

ana atathakar fi mawaqef mo3ayana wana sghayar lamma mathalan 7ad 3azeez fel 3eela yemoot w bakoon za3laan gedan bas gheer qader tamaman 3ala elbokaa2 ledaraga astaghrablaha ... wala dem3a ... bas kont bastaghrab lama ala2i 7ad yeegi y2olli enta kont za3lan awi webet3ayat ... wa2oolo la2a dana ma3reftesh we2olli la2a kont betebki ... w ka2en eli7saas itna2al ezay ma3rafsh ...

ma3lesh ana tawelt awi ...
i7sasik bemawakef w naas mate3rafihomsh gameel ... w mate2la2eesh lamma ykoon feeh 7aga be2eedik te3meleeha wenaf3a hatla2i enni hate3meleeha w hatgeelik eltheqa elli me7tagaha ..!!

Aladdin said...

مين اللي راسم اللوحة الجميلة أوي دي يا يارا؟!

yara said...

abdo basha:
أكيد برضه لازم أفهم ليه بعمل كدة يعنى مش بلوم نفسى و لا بحاسبها و لا بقسى عليها بس هى ردود أفعال مش مفهومة بالنسبالى

eh-ahwagi:
بما إنك زيى بقى عمرك ما فهمت ليه بتبقى ديه ردود أفعالك؟؟

aladdin:
مش عارفة مين اللى راسمها بس مش أنا

VEЯŎ said...

gameel 2l blog

-_- said...

يارا

مشاعرك نبيلة حتى لو مقدرتيش تعبري عنها

yara said...

VEЯŎ :
thank you
i'm happy u lik it

sharm:
ربنا يخليك
بلاحظ إنك بينطبق عليك مثل خير الكلام ما قل و دل

كلام لوجيك said...

يارا الغالية
انا نزلت بوست جديد فى صندوق الدنيا عشان ماتزعليش
يارب يعجبك
بس هصوم شوية عن التدوين
سامحينى

yara said...

أسامة: ماشى صوم بس الفطار على المغرب و لا إيه النظام؟؟

SomeOne said...

هههههههههههههههههه

انا برده اللي انزل بوست

طب ما انت كمان اهو منفضه للقضية

عموما انا نزلت بوست جديد

وبهديه ليكي

yara said...

shadi:
أنا كنت منفضة للقضية عشان كنت بمتحن
عقبالك كدة

Anonymous said...

حرام عليكي.. اتنكدت عشان الاتنين دول آخر نكد.. ربنا يتولى الجميع برحمته. لما باتوقف عند آلام الناس و أحزانهم بارتاح لما بييجي في خاطري ان ربنا أحن عليهم مني و أكيد اكيد هو أدرى بحالهم و هايتولاهم برحمته.

بوست احاسيسه عالية اوي.. تسلم ايدك

el2ahwagi said...

معلش إجابة متأخرة قوى

السبب هو ساعات إحساس الواحد ان الكلآم مهما إتقال هيكون تعبير سطحى جدآ عن الإحساس الحقيقى كأنك بتسقطى شيئ دافى جدآ على سطح بارد

و ساعات بيكون احساس بالغربة وسط الناس دى خصوصآ لو أغراب فعلآ
أو خوف من إن المشاعر دى تقابل بالصد و تسيب جرح من نوع ما

تصرفاتنا لا تقبل التبرير أحيانآ بس ده محاولة للتفسير بالنسبة ليا

معلش فكرتك باليوست ده تانى