كان

و أى حاجة ما تكونش حاجة الا و سببها فى الأصل حاجة
و بكرة لما قمركو يطلع و الشمس تسطع فوق كل حاجة
هاتقولوا كان فى المكان ده ناس فيهم طيابة فيهم حماس
و فى الحماس بعض الشئ عباطة
و كانوا آخر الآمر ناس
و كان زمانهم سجون
و كانوا بين سجونه و أمريكانه
و بين ضباب الطريق حيارى
ما حد قادر يشوف مكانه
هاتقولو كانو أو ياما كانوا
و ياما شربوا و ياما عانوا
و ياما جالهم و ياما جيلهم
وقع و كان الثمن أمانه
و ياما ناس فى المسيرة مشيوا
و ناس فى نص المسيرة خانوا
ها تقولوا كانوا أو ياما كانوا
ولكن ها يفضل فى الآمر حاجة
ان اللى عذب ما سابش حاجة
و ساب كلابه على كل حاجة
تهبش و تنهش فى كل حاجة
ما قدرش يقتل فى أى حاجة
روح التفاؤل لكل حاجة