؟؟

إستوقفتنى كلمة سمعتها فى مسلسل (هو اللى يسرق 120 جنيه زى اللى يسرق 120 مليون جنيه؟ و لا اللى يقتل واحد زى اللى يقتل ألف واحد؟ ) و

اللى يزور ورقة زى اللى يزور ورق؟ و يتستر على حقايق و يزور فى شهايد

يعنى: اللى يسرق 120 جنيه عشان المصلحة اللى بيشتغل فيها فصلته لتقليل مرتبات العمالة مثلاً

يعنى مش لسبب أخلاقى .. و مش لاقى ياكل و لا يأكل عياله بقاله كام يوم يعنى ما فيش لقمة دخلت بقة لا هو و لا عياله ف إضطر يسرق 120 جنيه

من ناس شبعانه شبعانه قوى .. بس عسان يسد جوع و لاده ده بقى .. زى

اللى سرق 120 مليون جنيه؟ زى واحد عنيه مش راضية تتملى و بقه مش راضى يتسد

و نهمه للفلوس ما فيش حاجة قادرة تقف قدامه

واحد بيسرق و هو مش محتاج الملايين اللى بيسرقها بيسرقها عشان بقت شغلته إن يسرق.. إتعود يعيش من مال حرام ..و يطفح و يطفح ولاده من الحرام

يعنى السرقة بقت بتجرى فى عروقه.. ملوثه دمه و أفكاره

و نظراته للأشياء مشوهه كل المعانى فى عنيه و عنين أولاده مدياهم قوة حتى

مش عند و احد طول عمره عارف ربنا و مراعيه و مستقوى بيه و ماشى جنب الحيط

طب بلاش ديه اللى قتل واحد

يمكن قتل غلط.. أو يمكن لحظة إسودت فيها الدنيا فى عينه من الظلم و الإفترا اللى بيشوفه

ما قدرش يشوف قدامه.. مقدرش يفكر مرتين قبل ما يقرر يرفع الظلم عن نفسه بدبح اللى ظلمه

و لا مرات أبوه اللى عيشته طول حياته فى كابوس بيتمنى يفوق منه بيستنى لحظة حنية من إبوه تعوضه عن مرارة الأيام و قسوة الأفعال ف ملاقاش غير كل عنف و قهر و إستبداد

ده زى اللى قتل ألف قتلهم لتلذذه برؤيه الدم و إستمتاعه و هو بيشوف ناس بيتوسلوله

عشان يرحمهم .. عشان يسيبهم فى حالهم

اللى ياما عمل مجازر و ياما دبّح فى خلق الله الضعيفة المحتاجة بس عشان هما محتاجين

أو يمكن عقاباً ليهم على صراعهم من أجل البقاء

دول زى دول؟؟؟؟

الفرق الوحيد إن اللى سرق ال 120 جنيه إضرب فى المكان اللى سرق منه و إتشتم بأبشع الألفاظ و راح القسم بتهمة إنه حرامى عشان يمرمطوه و يقضوا عليه السهرة ضرب و شتيمة و بهدلة .. خلوه يرجع اللقمة دم و ها يعيش طول عمره بيتقال عليه حرامى... و اللى سرق ال 120 مليون جنيه هربهم كلهم على برة

و طلع وراهم و سط هالة من الإهتمام و الإحترام و التعظيم و التمجيد

و الحكومة كلها واقفة وراه أو معاه بتهلله و تمجده

و اللى قتل واحد إتحبس و إتعدم و راح فى شربة ميا و ضاع مستقبله و راحت سمعته و سمعة أهله فى التراب

بس اللى قتل ألف إتمجّد و إتعظّم و إضربله تعظيم سلام عشان هو رجل السلام

بالذمة ده حلال ده و لا حرام؟؟؟

مراجعة نفس

ماكنتش ناوية أبطل كتابة.. بس حسيت إنى مش قادرة أكتب و لا عارفة أترجم مشاعرى لكلمات أوصف بيها حالات أنا عايشاها

إتعودت و أنا بمر بأى موقف إنى أشوف كدة ممكن أتناوله فى البلوج بتاعى إزاى .. لو مهم إنى أشارك بيه الناس اللى إتعودوا يقرولى و

لا لا.. حالة كدة من المشاركة و التعود على الكلام معاكوا فى كل حاجة.. و مناقشة مواضيع تهمنى ..كمان كنت أحياتاً بحكى حاجات محدش يعرفها عنى

إتعودت على كدة ..بس بعد ما إنقطعت شوية رجعت تانى أتعود على حالة الإنغلاق اللى أصلاً بعانى منها و إن كل حاجة أحسها تتخزن فى أبعد مكان ممكن الناس توصله

المهم حسيت إنى مفتقدة الشارينج و التواصل اللى كان بيحصلى معاكوا... مفتقدة إنى أحس إنى بسمع أراء ناس تانية فى مواضيع تهمنى و قررت إنى ها أرجع أكتب تانى

إنشاالله لو شوية هبل بقوله بس ها أرجع أشغل نفسى تانى بالإهتمام بعالم تانى غير عالمى الضيق اللى حواليا

و فعلاً بكتب فى بوست جديد و ها أنشره قريب قوى إنشاءالله

بس قبل ما أكتب حاجة يإسمى حابة أنشر حاجة بتعبر عن كل حاجة كنت بفكر فيها حاسة كإنى أنا اللى كتبته أو هى ديه أرائى قوى

.....

..

هل تسمحون لي؟
في بلاد يغتال فيها المفكرون، ويكفر الكاتب وتحرق الكتب، في مجتمعات ترفض الآخر، وتفرض الصمت على الافواه والحجر على الافكار، وتكفر اي سؤال، كان لابد ان استأذنكم ان تسمحوا لي..

ِ فهل تسمحون لي ان اربي اطفالي كما اريد، وألا تملوا علي اهواءكم واوامركم؟
وهل تسمحون لي ان اعلم اطفالي ان الدين لله اولا، وليس للمشايخ والفقهاء
فهل تسمحون لي ان اربي اطفالي كما اريد، وألا تملوا علي اهواءكم واوامركم؟
وهل تسمحون لي ان اعلم اطفالي ان الدين لله اولا، وليس للمشايخ والفقهاء والناس؟
هل تسمحون لي ان اعلم صغيرتي ان الدين هو اخلاق وأدب وتهذيب وامانة وصدق، قبل ان اعلمها بأي قدم تدخل الحمام وبأي يد تأكل؟
هل تسمحون لي ان اعلم ابنتي ان الله محبة، وانها تستطيع ان تحاوره وتسأله ما تشاء، بعيدا عن تعاليم أي أحد؟
هل تسمحون لي الا اذكر عذاب القبر لاولادي، الذين لم يعرفوا ما هو الموت بعد؟
هل تسمحون لي ان اعلم ابنتي اصول الدين وادبه واخلاقه، قبل ان افرض عليها الحجاب؟
هل تسمحون لي ان اقول لابني الشاب ان ايذاء الناس وتحقيرهم لجنسيتهم ولونهم ودينهم، هو ذنب كبير عند الله؟
هل تسمحون لي ان اقول لابنتي ان مراجعة دروسها والاهتمام بتعليمها انفع واهم عند الله من حفظ آيات القرآن عن ظهر قلب دون تدبر معانيها؟
هل تسمحون لي ان اعلم ابني ان الاقتداء بالرسول الكريم يبدأ بنزاهته وامانته وصدقه، قبل لحيته وقصر ثوبه؟
هل تسمحون لي ان اقول لابنتي ان صديقتها المسيحية ليست كافرة والا تبكي خوفا عليها من دخول النار؟
هل تسمحون لي ان اجاهر، ان الله لم يوكل احدا في الارض بعد الرسول لان يتحدث باسمه ولم يخول احدا بمنح 'صكوك الغفران' للناس؟
هل تسمحون لي ان اقول، ان الله حرم قتل النفس البشرية، وان من قتل نفسا بغير حق كأنما قتل الناس جميعا، وانه لا يحق لمسلم ان يروع مسلما؟
هل تسمحون لي ان اعلم اولادي ان الله اكبر واعدل وارحم من كل فقهاء الارض مجتمعين؟ وان مقاييسه تختلف عن مقاييس المتاجرين بالدين، وان حساباته أحن وارحم؟

هل تسمحون لي؟؟

دلع المفتى

ما فيش

نسيت الكتابة و إزاى أكتب

و إزاى أعبر عن اللى أنا حاسة بيه

حتى المواضيع اللى حواليا ما بقتش بتستفزنى زى الأول

و حتى يمكن ما بتأثرش فيىّ أصلاً

متهيألى المفروض أعتزل

Bye

حسني مبارك .. اهداء الى شعب مصر

ياشعبي حبيبي ياروحي يابيبي

ياحاطك في جيبي يابن الحلال

ياشعبي ياشاطر ياجابر خواطر

ياساكن مقابر وصابر وعال

ياواكل سمومك يابايع هدومك

ياحامل همومك وشايل جبال

ياشعبي اللي نايم وسارح وهايم

وفي الفقر عايم وحاله ده حال

احبك محشش مفرفش مطنش

ودايخ مدروخ واخر انسطال

احبك مكبر دماغك مخدر

ممشي امورك كده باتكال

واحب اللي ينصب واحب اللي يكدب

واحب اللي ينهب ويسرق تلال

واحب اللي شايف وعارف وخايف

وبالع لسانه وكاتم ماقال

واحب اللي قافل عيونه المغفل

واحب البهايم واحب البغال

واحب اللي راضي واحب اللي فاضي

واحب اللي عايز يربي العيال

واحب اللي يائس واحب اللي بائس

واحب اللي محبط وشايف محال

واحبك تسافر وتبعد تهاجر

وتبعت فلوسك دولار او ريال

واحبك تطبل تهلل تهبل

عشان مطش كوره وفيلم ومقال

واحبك تأيد تعضض تمجد

توافق تنافق وتلحس نعال

تحضر نشادر تجمع كوادر

تلمع تقمع تظبط مجال

لكن لو تفكر تخطط تقرر

تشغلي مخك وتفتح جدال

وتبدأ تشاكل وتعمل مشاكل

وتنكش مسائل وتسأل سؤال

وعايز تنور وعايز تطور

وتعمللي روحك مفرد رجال

ساعتها حجيبك لايمكن اسيبك

وراح تبقى عبره وتصبح مثال

حبهدل جنابك واذل اللي جابك

وحيكون عذابك ده فوق الاحتمال

وامرمط سعادتك واهزأ سيادتك

واخلي كرامتك في حالة هزال

وتلبس قضيه وتصبح رزيه

وباقي حياتك تعيش في انعزال

حتقبل ححبك حترفض حلبك

حتطلع حتنزل حجيبلك جمااااال

Dream

I saw you today

saw your face that i wished to see for a long time

remembered your smile .. your sweet words

your being funny and always there for us

you know when faces

don't mean anything anymore?

it become just shapes ...

not good ..not bad ..just shapes

when you look at your face at the mirror

and you dont feel anything

it doesn't make any sense anymore?

But today your face meant alot to me

i needed to see it

needed to feel you are still there ..

needed to make one more conversation with you

needed to hear you ..

and to know your attitude

since i knew i won't see you anymore

i started to worry what if i forgot your face

what if it will be a time sometime ...

may be long or short ..

but it will be time till you are forgotten

till you become someone at the past

But i discovered that

you will always be in our hearts

and we will not forget about you

we will never ever do

even if it will be with dreams and wishes

our last conversation you were joking

and you were telling me that

one day you will go

and that i will miss you

and i was laughing so much

and said ( hehe..noway )

i didn't think about your words

and didn't take it seriously

but you left anyway

maybe you were too good to stay

so you left to a better place

i'm not worried about you .. i just miss you

Take care

Madness

It's Madness

To hate all roses

Because got scratched with one thorn..
To give up on your dreams

Because one didn't come true..
To give up on your efforts

Because one of them failed..
To condemn all your friends

Because one betrayed you..
Not to believe in love

Because one wasn't faithfullor didn't love you back..
To throw away all your chances to be Happy

Because you didn't succeed on the first attempt..
Remember Always..
Another chance may come up..

Another friend..

A new love..

A renewed strenght..

Be persistent..

Look for Happiness in everywhere..
The sure path of failure is to give up !

It's often through failure that Future success comes

Baladna

بلدنا آمانة فى إيدينا نعليها مادام عايشين

نعيش فيها سنين و سنين و إحنا مطمين

ما شربتش من نيلها؟ طب جربت تغنيلها؟؟

جربت فى عز ما تحزن تمشى فى شوارعها و تشكيلها

ما مشيتش فى ضواحيها؟ طيب ما كبرتش فيها؟؟

ولا ليك صورة ع الرمل دامت ع الشط بمعانيها؟؟

دور جواك تلقاها هى الصحبة و هى الأهل

عشرة بلدى بتبقى نسيانها ع البال مش سهل

يمكن ناسى لإنك فيها

مش واحشاك و لا غيبت عليها

بس اللى مجرب و فارقها قال فى الدنيا ما فيش بعديها

إن غبت بحنلها و أنسى الدنيا و أجيلها

و إن جيت أنسى تفكرنا بمليون ذكرى القلب شايلها

غالية بلدنا علينا و ها تفضل فى عنينا

و مدام بنحب بلدنا تبقى ها تتغير بإيدنا

إحنا اللى نعليها بإيدينا نخليها

أجمل لينا و لولادنا مهما العمر يعدى عليها

دور جواك تلقاها هى الصحبة و هى الأهل

عشرة بلدى بتبقى نسيانها ع البال مش سهل

يمكن ناسى لإنك فيها

مش واحشاك و لا غيبت عليها

بس اللى مجرب و فارقها قال فى الدنيا مافيش بعديها

song for Shreine Ahmed

وحدة

بقالى فترة طويييييييييلة شاغلانى فكرة العيشة من غير هدف أو فقدان الهدف أو التنازل عنه لأى سبب من الأسباب

فيه حاجات كتير أحياناً ببقى عايزه أغيرها أو أتنازل عنها أو أبعد عنها

و أرجع أتراجع لمجرد عدم قدرتى على تخيل الحياة من غيرها و حالة الفراغ العمييييقة اللى ها أعانى منها

إكتشفت قريب قووى إن الواحد ممكن يفضل معلق نفسه بحاجات أو ناس أو أراء أو أفكار لمجرد الخوف من الوحدة

من بعدهم

أو يمكن خوف من التغيير فى حد ذاته

خايفة قوى من اليوم اللى ها أخلص فيه الكلية .. مش عارفة شكل الأيام ممكن يبقى إزاى

لو كلها بقت شبه بعضها و كلها مالهاش معنى

خايفة من الوحدة و الفراغ اللى ها أبقى فيهم لو ما إشتغلتش

مش بس فكرة التخرج و طوى صفحة الدراسة هى اللى قلقانى .. إنما فكرة طوى أى صفحة عموماً رعبانى

حبيت قوى فكرة الهدف ... إن الواحد يبقى وراه حاجة يعملها بكرة و بعده و بعده

إن يبقى فيه خطة أمشى عليها .. إن يبقى فيه حاجة أصحى عشانها... مش حباً فى المذاكرة

إنما زى ما قلت أنا بتكلم عن الفكرة عموماً .. فكرة الحياه من أجل أشياء ثم المفاجأة بإنتهائها

أو ضياعها من إيدينا اللى أحياناً كتير بيجى فجأة و من غير ما الواحد يبقى مستعد للفراغ المعنوى

اللى ها يعيشوا من غير الحاجات ديه

مش عارفة أنا صح و لا لأ بس أحياناً كتيييييير بفضل جوة قصص لمجرد إنى أبقى عايشة عشان حاجة

أحياناً كتير بيبقى فيه خطط أو مشاريع فى دماغى و أعملهم واحدة واحدة عشان ما أخلصش كل المتعة مرة واحدة

بظبط زى ما أكون فى صحراء و معاية إزازة مياه و احدة

و عطشااااانة جداً بس أشرب بق واحد عشان أسيب شوية لبعدين

إيه معنى الحياه لو عشت أعمل خطط و تخلص ... أو تنتهى نهاية مأساويه

إيه إحساس حد فضل لفترة طويلة قوى يخطط لمستقبله مع حد مثلاً

و بعدين إتفاجأ إن كل الخطط ديه مش ها تتحقق لموت الشخص ده أو إستنداله أو يمكن لظروف خارجة عن إرادة الإتنين

إيه إحساس واحدة بتحلم طوووول عمرها بطفل تشبع فيه غريزتها

و تتفاجأ بعدم قدرتها على تحقيق الحلم ده

أيه إحساس حد فقد أهله أو أمه و بقى مش مستنى عيد الأم عشان يجيب لأمه هدية تعبر عن مشاعره ليها

إيه إحساس الوحد و الفراغ

ماله سخيف قوى كدة و قاتل و مؤلم

مش متأكدة إن إحساسى ده ممكن يوصل

بس هو نوع من أنواع الخوف على كل حاجة لىّ

أحياناً بيبقى كل اللى بيمتلكه الواحد حاجات قليلة قوى

ف ما بيبقاش عنده أى إستعداد يفقد حاجة منهم

و أحياناً بيبقى كل اللى بيتمناه حاجات صغيرة قوى

ف مافيش مجال إن حاجة منهم ما تتحققش

sorry for not replying on the comments i receive but

that's because i'm really busy these days but i will reply on it soon

E-mail i got

حاجات كتير بتتميز بيها بلدنا .. منها اللي يزعل ومنها اللي يقهر .. ومنها اللي يشرح القلب .. وتشتاقله لو روحت فين .. زي طبق الفوووول المعمر اللي لازم أي بلد يحل فيها المصريين .. يحل معهم هذا الحارس الخاص وهذا المضاد الحيوي .. وتفتح المحلات والمطاعم لتلبية طلب المصريين في لندن والسعودية وأمريكا وبلاد الفرنجة فرنسا حاليا .. وإليكم بعض هذه المشاهد الحصرية.

* لم يذكر السجن في القران الكريم إلا في مصر (في سورة يوسف )
*في مصر فقط .. الأموات ينفقون علي الأحياء "الفراعنة والأهرامات والذي منه"
*في مصر فقط .. تجد شخصا أقل منك في المستوي العلمي وحصل علي 50% فقط في الثانوية العامة .. ولكنه يتنطط عليك أو بالبلدي يركب ويدلل رجليه لأنه ببساطة دخل بيهم شرطة .. اللي في خدمة قفا الشعب.
*في مصر فقط .. ينمو نبات البردي وورد النيل والجرجير والخبيزة والليف - حتة ثقافة -
*في مصر فقط .. توجد السلعوة وهي "مسخ" ناتج عن تزاوج الكلاب الضالة في جو العاصمة الملوث - حتة جيولوجيا -
*في مصر فقط .. تأكل الحواوشي والشكشوكة والكشك الأسيوطي والملوخية بالأرانب والمسقعة والكشري ومحشي الكرنب وطاجن العكاوي والكبدة الاسكندراني .. آه نسيت .. والفووووووووووووووووول اللي مش سوداني.
*في مصر فقط .. تعبر الكلاب الشوارع بطريقة أشبه بالتي يعبر بها الآدميون .. تقف الكلاب علي جانب الطريق تنظر يمينا ويسارا حتى تعبر في أمان .. وليت البشر عندنا يعبرون بالطريقة نفسها ينجون مثل الكلاب .. ولكن المواطن المصري والمصري فقط يجب أن يعبر الشارع كطائر البطريق أو البط البلدي.
*في مصر فقط .. يمتلك المواطن بالوقت والممارسة مهارات خاصة في ركوب الأتوبيسات المسرعة والتسلل إلي العمق أو الوقوف بأطراف أصابع القدم علي أخر درجة في السلم "اطلع من علي الباب يا فندي العربية فاضية أدام" .. طبعا ربنا ما يوريك بقى لو كانت مليانه.
* في مصر فقط .. تنشب الصداقة سريعا وفي اقل من ثوان في إشارة المرور أو في مصلحة حكومية أو في الأسانسير أو حتى في طابور العيش.
* في مصر فقط .. تجد منطقة سكنية بكاملها (سارقة كهربا ) مثل عزبة الهجانة - حتة تعداد سكاني -
* في مصر فقط .. ملك فرعوني بني لنفسه تمثالا ضخما لا تشرق الشمس علي وجهه إلا مرتين في السنة مرة يوم عيد تتويجه ملكا ومرة يوم عيد ميلاده هو شخصيا .. "صبح .. صبح .. يا عم الحاج"
* في مصر فقط .. وزير ( يسرطن ) الشعب ثم يرشحه الحزب الحاكم في انتخابات مجلس الشعب .. بس مش أي شعب .. ده شعب على أبوه.
* في مصر فقط .. ينادي وزير التعليم بإلغاء مجانية التعليم.
* في مصر فقط .. يتم إنفاق ملايين الجنيهات من أجل الحصول علي "صفر كبير" أمام العالم .. كانوا خايفين ياخدوا درجة بالسالب .. بجد الصفر أرحم.
* في مصر فقط .. يقدم الكشري ساخنا في أكياس بلاستيكية شفافة.
* في مصر فقط .. ادفع وبعدين اشتكي - لتحصيل أولا -
* في مصر فقط .. الاختيارات السياسية المتاحة أمام المواطن هي التصويت بـ "نعم " او "لا"
* في مصر فقط .. تم القضاء نهائيا علي ظاهرة "إدمان الهيروين" بعد أن أصبح "البانجو" في متناول الجميع .. ولم يعد لكوكو الضعيف (السجائر الغير محشية) الشعبية السابقة بين الناس.
* في مصر فقط .. رئيس حزب لازال مرتديا الطربوش حتى الآن.
*في مصر فقط .. لا يتم وضع الملصقات إلا تحت لافتة "ممنوع لصق الإعلانات"
* في مصر فقط .. لا يمتلك المواطنون زيا رسميا موحدا ويصعب أن تعرف المصري من مجرد ملابسه ( إلا لو كان لابس تي شيرت مكتوب عليه بالأخضر "فكر جديد")
*في مصر فقط .. يوجد نوع من المسكنات علي هيئة مصطلحات يتم تقديمها للشعب بجرعات مكثفة مثل ( الشفافية) ,( التمثيل المشرف) , ( إشادة البنك الدولي بمصر),( أهمية الدور الذي يلعبه شباب النيل .. جيل المستقبل).
أخيرا فإن ما يوجد في مصر فقط وحصريا على أرض الواقع أكثر بكثير مما نستطيع حصره في مجرد سطور .. ولكننا نقولها وبكل شاعرية ودراماتيكية وحنية:"عظيمة يا مصر يا أرض النعم"

والآن نترككم مع الفنان الشعبي شعبان عبد الرحيم – اللي مفيش منه برضه غير في مصر – مع نشيد بلادي بلادي .. لك حبي وفؤادي.

and ofcourse it's an email i wanted to puplish..

tag

زهقوا قوى منى أسامة (كلام لوجيك ) و شادى و تعتعة أزهرى
من إنى أكتب فى المنطقة السودا أو المواضيع الخنقة زى ما بيقولوا و فى نفس الوقت بعتلى كبير المتشردين تاج جديد قلت أعتبره البوست المنتظر
الأول أحب أقول ل كبير المتشردين
ميرسى على التاج مع إنى بكره الفكرة قووووى
المهم
السؤال الأول:
كنت طالب شاطر في المدرسة؟
آه كنت شاطرة فى المدرسة الحمدلله و دايماً كنت من الناس ال
leader
فى المدرسة و كنت باخد جوايز فى مسابقات الرسم و أحياناً على نتايج الإمتحانات بس معظم الجوايز كانوا على الرسم و كان عمرى ما ببقى موجودة فى الفصل دايماً يا فى المرسم يا مشتركة فى مسابقة عزف و أحياناً أنا و أصحابى نروح المكتبة و كنت لما بعوز أزوغ كنت أبعت لمدرسين الرسم و أقولهم إبعتوا طلعونى من الفصل و قولوا إنكوا عايزنى

السؤال الثاني ايه اكتر مادة حبيتها واكتر مادة كرهتها في مرحلة المدرسة ومرحلة الجامعة؟
أيام المدرسة أكتر مادة حبيتها كانت الرياضة
كنت بموت فيها و بفهمها بسهوووولة قوى و أكتر مادة كرهتها العربى و الفيزياء
أما أيام الجامعة ف أنا بمووووت فى مواد الرسم عموماً و شاطرة فيهم و كمان الخرسانة برضه تعتبر مادة رسم و أكتر مادة كرهتها ال
Material & Soil

السؤال التالت كنت عايز تطلع ايه وانت صغير؟
طول عمرى كنت ها أموت و أدخل هندسة و كنت مستقرة جداً على الرغبة ديه بس ندمت ندم عمرى على الإختيار ده و بتمنى لو يرجع بىّ الزمن عشان أدخل فنون تطبيقية أو جميلة عشان هى ديه ميولى الحقيقية أى حاجة ليها علاقة بال
Art

أبوس إيديكوا إعملوا حاجة

فى سابقة جديدة من نوعها و يمكن تعتبر فريدة من نوعها و خاصة فى ظل الظروف و الأجواء المصرية التى نعيشها تلك الأيام تحرك جزء من الشعب المصرى فى سبيل المطالبة بحقوقه ... يمكن عددهم ما زادش عن عشرة آلاف مواطن مطحون محروق طلعان عينه مع الحكومة و النظام الفاسد المرتشى ... و لكن ستظل التجربة جديرة بالإحترام ... تجربة الآلاف من الموظفين و العمال فى شركات المطاحن فى شمال و جنوب و شرق و غرب مصر و الذين واجهوا بين عشية و ضحاها قرار جديد من وزير التضامن الإجتماعى بتحميل شركات المطاحن بمصانعها التابعة للقطاع العام بتصريف ما يزيد عن 340 طن يومياً من إنتاج القطاع الخاص... لتتوقف هذه المصانع عن الإنتاج الخاص بها لتصريف إنتاج القطاع الخاص أولاً و من ثم البدء بإنتاجهم الخاص مما يعنى نقصان إنتاج القطاع العام اليومى بما يزيد عن النصف مما يعنى حرمان عمال و موظفين القطاع العام بالحوافز اليومية التى يتقاضوها عن نسبة الإنتاج مما يعنى خراب بيوت و تدمير و تشريد الآلاف من الأسر المعتدمين على الحوافز و البدلات لزيادة دخلهم الناس ديه بين يوم و ليلة صحيوا على كابوس مزعج بإضطرارهم لتقضية الشهر كله بما يقل أو يزيد قليلاً عن 150 جنيه يعنى ياكلوا و يشربوا و يدفعوا فواتير مياه و تليفونات و كهرباء و مصاريف دروس وتعليم و علاج و و و ......ب 150 جنيه فى الشهرحد يقولى المطلوب منهم يعملوا إيه يسرقوا؟؟؟ و لا يشردوا ولادهم و يرموهم فى الشوارع؟؟؟ و لا يقتلوا اللى حالفين ما يسيبوا حاجة فى البلد إلا و ينهبوها

لغوا الدعم على رغيف العيش اللى الكتيييييير من الأسر بيعيشوا عليه صبح و ظهر و بليل لغوا الدعم على كل السلع الإستهلاكية لغوا التموين و لغوا و لغوا و لغوا.... و حطينا الجزمة فى بقنا و معملناش حاجةإنما ما إكتفوش بالدوس بالجزم على الشعب الغلبان المهموم المجروح المطعون فى كبريائه جوه بلده دول كمان بيستنزفوه مش عارفة لمصلحة مين كل ده ...بكل التأخر و القهر و الإستبداد اللى بنعيشه واللى بنواجه بحالة من الصدمة و الصمت اللى يخنق ظهرت حركة شعبية جديدة حركة تظاهر و إعتصام من أضعف فئات الشعب المصرى من الفئة اللى تقريباً بتعيش تحت خط الفقر فى محاولة منهم لإستعطاف الوزير بالعدول عن قراره... الناس ديه إستبيّعت فجأة و قالت علىّ و على أعدائى و قرروا الإمتناع عن العمل و الإعتصام فى مقرات أعمالهم فى محاولة منهم لتوصيل صوتهم.. كان إحساسى غريب قوى و أنا بتابع أخبار الإعتصام عايزة أصرخ و أقول أيوة كدة بقى إنطقوا ..أبوس إديكوا إعملوا حاجة ...المهم طلعنا أهوه قادرين نعمل حاجة صحيح لازم ينداس علينا عل الآخر عشان نوحد كلمتنا بس يرضه قادرين نعمل حاجة قادرين نقف مع بعض و نطالب باللى إحنا عايزينه قادرين نوصل صوتنا

طب ليه بقى الصمت ؟؟

ليه الإنهزامية ؟؟

ليه الرضوخ؟؟

أبوس إيديكوا إعملوا حاجة

i did it

I'm Back
I'm Free
I'm Careless
I'm Breathing again...
I started my Exams (Mid-Term)
It wasn't long till they were over
Not long till it's all in the past
And it was the result day
I got my result and i passed
I succeeded
I Don't Believe it... But
I guess i'm happy

مشهد

مش فاكرة كنت فى تانية ثانوى و لا تالتة ثانوى لما مريت ب لحظة معرفتش أنساها لغاية إنهاردة ..و متهيألى مش ها أعرف أنساها عمرى... كان يوم عادى جداً مش فاكرة كنت فى الشارع ليه فى عز الضهر و ماشية لوحدى ..برضه مش فاكرة كنت راحة فين ..مش بقولوكوا اليوم كان عادى قوى و أحداثه عادية جداً ما تستحقش إنى أفتكرها عشان كدة كان ممكن جداً يمر اليوم ده زيه زى غيره من غير ما افتكره و لا أرجع أتكلم عنه تانى... لولا الموقف اللى مريت بيه يومها ...واحد عدّى جانبى بعجلة ماشى ببطىء و براحة قوووووووى و كإنه ماشى على أعز ما يملك.. إستغربت البطئ و الحرص اللى هو ماشى بيهم أتاريه رابط فى العجلة من ورا بتاع عشر كراتين بيض فوق بعض و خايف عليهم زى عنيه.. لأ و بيسوق العجلة ب إيد و الإيد التانية مرجعها ورا ضهره و سانده على الكراتين... أحلف على المصحف إنه كان متأكد إن إيده اللى ساندها على البيض ديه و جودها زى عدمها و إن الحركة ما تزيدش عن حركة تلقائية عملها ناجمة عن خوفه و حرصه على الكراتين و كل شويّة يلّوح راسه و يبص بصة على البيض ....كانت محاولة مالهاش معنى بس تستحق الإحترام لدرجة إن قلقه و خوفه و حرصه إتناقالولى و بقيت عايزة أقوله ماتخافش مش ها يحصل حاجة إنشاء الله ..و فى نفس اللحظة ديه كان هو داخل شارع جانبى و هو بيحود العجلة مالت منه و فقد توازنة بس موقعش ..هو كان كويس بس العشر كراتين بيض إتنقلوا من فوق العجلة للأرض عاملين مجزرة على الأرض ... ف كان أول رد فعل لىّ و أنا واقفة بعيد بتابع الحدث شهقة قوية جداّ و حزن و حصرة ..أما هو ف كان رده إنه نزل رجل من على الدواسة و سندها على الأرض و لوح راسه تانى و بص على البيض نظرات طويلة ماعرفش ليه إتهيألى عدت عليه سنة و ركن العجلة و نزل من عليها و عنيه لسة على البيض و إيديه الإتنين إترفعوا و إستقروا فوق راسه تفكيره مشلول مش عارف يعمل إيه كنت متأكدة إن فيه مليون فكرة عدت فى دماغه فى اللحظة ديه... فكر فى أهله ..و شغله..و صاحب المحل اللى أكيد باعته بالكراتين ديه فى حتة ..و فى البلاوى اللى مستنياه مش عارف.. يعمل إيه و لا يفكر إزاى ..يلم البيض السليم و لا يسيبه و لا يعمل إيه و أنا كمان كنت بشاركه أحاسيسة مليون برضه فكرة جت فى دماغى أساعده فى لم البيض.. و لا أواسيه بكلمتين ..و لا أديله فلوس.. و لا أروح معاه لصاحب المحل و أديله هو الفلوس و أقوله ما يعملش للولد حاجة و ما يقطعش رزقه... مليون فكرة و الوقت قليل المهم من كل حيرتى ديه طلعت بقرار ...و روحت واخدة بعضى وماشةهو ده كل اللى أنا قدرت أعمله... مشيت ...من غير ما أنطق ب ولا كلمة و لا حتى قلتله فداك ماتزعلش نفسك

مشييييييييييت




بعد كام سنة إتكرر مشهد مشابه و أنا نازلة من البيت لقيت راجل كبير فى السن عجووووووز قوى

و كان أسمر قوى مش فاكرة ليه فاكرة ملامحه لغاية دلوقتى بوضوح المهم كان عمال يعيط بحرقة غريبة و كإنه فقد كل حاجة ليه فى الدنيا و لقى نفسه لوحده فجأة بيعيط بصوت عالى و بشحتفة و بيقول كلام مش واضح ..أصلاً مش مسموع ..فكرت بينى و بين نفسى إيه اللى ممكن يخليه يوصل لحالة الإنهيار ديه.. فى السن ده.. إيه هى الصدمة اللى لسة مصدومها بعد العمر ده كله ..إيه اللى يستاهل و كنت عايزة أروح أسأله و أكلمه و أخد بخطره و فعلاً قربت منه بس قبل ما أوصله نفس الموقف إتكرر تانى

نفس حالة الجبن و الخوف من مواجهة الناس فى لحظات آلامهم

مش عارفة ليه بعمل كدة... ليه بحس إنى مش قادرة أشاركهم أحزانهم و همومهم.. ليه بعجز عن مواساة أقرب الناس لىّ ..ببقى عايزة أعمل كدة بس ما بقدرش ..عمرى ما عرفت أحول إهتمامى و تأثرى بأحزان الناس و معاناتهم لرد فعل حقيقى دايماً بكتفى إنى أفضل جنب الحد ده من غير ما أنطق ولا كلمة عمرى ما حضنت صاحبتى و هى بتعيط و لا طبطبت عليها بالعكس بحط راسى فى الأرض و أكتفى باللزقة جانبهم و لسانى محشور جوة بقى و أتخرس و أتكتم كتمة مش مفهومة و لو حاولت أتكلم بلاقى صوتى متحشرج و مش راضى يطلع و أفضل أتمتم كدة بكلمات مالهاش معنى و غالباً ما بتبقاش مفيدة

الإخوان

إن من أقصر الطرق للوصول الى الأهداف السياسية والإجتماعية وخصوصا في المناطق ذات الموروث الديني والروحاني والشعبي .. هو طريق الدين و طريق الدين عندنا يتمثل فى جماعة الإخوان المسامين ..لاحظت فى الآونة الأخيرة حالة إتفاق شعبى على الإعتراف بالجماعات الإسلامية و ما تشكله من تنظيم حديدى يقوم على الطاعة المطلقة كقوة عظمى تعادل قوة الحزب الوطنى بنفوذه و آلياته.. و طبعاً أقصد بالجماعات الإسلامية جماعة الإخوان المسلمين و أكثر ما يقلقنى فى هذا الإمتداد و التشعب لجذور أفراد هذة الجماعة و حالة الإستجابة الفكرية و الشعبية لجماعة الإخوان و الدعم الجماهيري الذى يلقاه الإخوان المسلمين و تغير النظرة الخائفة بنظرة أكثر ثقة ب أن الإخوان هم الحل ...و أنهم السبيل و طوق النجاة
حيث أوضحت نتائج المرحلتين الأولى والثانية من الانتخابات البرلمانية بأن حصة الإخوان من الكتلة التصويتية تزيد حتماً على الثلث
و لكن هل الحل للخلاص من الإستبداد هو إستبداد أكبر و أعنف
أم لا يتعدى الأمر عن كونه حالة تناقض جديدة يعيشها المصريون بين ما يريدونه و بين ما يعتقدونه وسيلة للخلاص
و هل النسبة الرافضة للإخوان المسلمين قادرة على مواجهة الأغلبية بما تعانيه من تشدد فكرى و مذهبى ف هذ ا التنظيم الفولاذى بشعراته و ثقافاته قادر على تهديد الوطن المصرى ب خطر أكبر من خطر مبارك ..خطر العنف و الإستبداد الدينى و القهر الفكرى ..خطر التشدد و الإرهاب ..خطر الصوت الواحد و الرأى الواحد و الفكر الواحد
كثيراً ما يختلط الأمر عندى و أفقد القدرة على التميز بين جماعات الإخوان المسلمين بشعار الإسلام هو الحل و بين الجماعات الإرهابية ..فلم يكن أبداً هناك معنى ثابت لهذا الشعار ف كثيراً ما أساءوا إستخدام هذا التعبير ف كانت النتائج تطرف فكرى و دينى لحاملى هذا الشعار... و بلبلة و إنشقاقات بين أفراد المجتمع المصرى بما يعانيه من ضعف واضح للثقافات و رغبة دائمة ب أن يقوده الأعلم و الأقدر من وجهة نظر هؤلاء الأفراد المستسلمين و كأن الأمر لا يعنيهم أخاف من خطر الفتنة الطائفية على مصر و المصريين ف المجتمع المصرى يجمع بين مسلمين و أقباط
وليبراليون ويساريون وناصريون و كلهم لا يريد الإخوان


i didn't think that i'm qualified enough to talk about such a critical matter we suffer from in Egypt
but it's just a trial for me to open that door

dark shadow

العمر بيجرى زى القطر..والدنيا مفارق كلها ملفات ..ماشين على سطر و سايبين سطر.. ومين فينا زى ما إتولد مات.. فى كل توب أبيض نقط سودة..و لا حد فينا من الذنوب معصوم..مخلوقة فينا الحيرة مقصودة..يين الإختيار و المنّ بالمقسوم ..الدنيا بحر غريق و شط..و العمر بينهم زى خط..بالمسطرة مرسوم.. عداد العمر داير و إتفرقت المصاير.. بتاخدنا دوامات و نتوه جوة الدواير..ده طريق نهايته سدّ ..كان خلد فيها حد؟.. قام مطلعش بخساير



كنت بسمع الأغنية ديه لمدحت صالح و لقيت فيها معانى كتير قوى عاجبانى..و حسيت إنها محتاجة منى تركيز و تأمل

كل كلمة فى الأغنية صح قوى و فى مكانها قوى و فى وقتها قوى

ما هياش حالة طارئة جايالى و ها تعدى.. و لا موود و ها يخلص..هى حالة تأمل دايماً بتجيلى فى لحظة من لحظات التواصل بين نفسى و اللى حواليا .. و برضه مش قادرة أعتبرها وقفّة مع النفس المهم سيبونا من المسمى و خلينا فى المعنى أو المضمون

صحيح مين فينا من الذنوب معصوم مين فينا مش محتاج يغفر لناس و يطلب منهم يغفروله

مين توبه أبيض أو ناصع البياض

إيه هى غلطاتنا و إيه هى الحدود الفاصلة بين الغلطات القاتلة والغلطات المسموح بيها ... إيه هى أكبر خسايرنا و أهمها

مين بيحدد إيه اللى يتنسى و إيه اللى المفروض يعلّم ..لو كل التساؤلات أو الإفتراضات ديه كانت فى علاقتى مع ربنا كنت ما أهتمتش قوى بمعرفة الجواب عشان فى الإخر عارفة إن ربنا أقدر و أعلم باللى فى النفوس هو اللى يقدر يحاسب و يغفر و يهدى.. لكن أنا عايزة أعرف بين إنسان و إنسان مين اللى بيحط الحدود الفاصلة

هو مجرد تساؤل و مش عارفة إيه الهدف منه أو حتى إيه أهمية الإجابة عليه

مش عارفة إيه حالة الكآبة اللى طاغية على المدونون كلهم اليومين دول

كل ما أدخل على بلوج ألاقى تساؤولات متشائمة أو بوست كئيب

إشمعنى فى التوقيت ده كله إكتئب و تعب وإستسلم .. يمكن إكتشفوا إن التدوين ما حققلهمش حاجة

أو يمكن الحكم على عبد الكريم حسسهم إن مساحة الحرية اللى طالما إتمنوها طلعت حرية وهمية؟؟

مش عارفة .. بس صحيح

بعد سنة من دخولى أنا عالم التدوين و يمكن أكتر أو أقل ليكوا إنتوا إيه اللى إتحقق ب التدوين و إيه الفرق اللى حصل

إعترافات

و أخيراً إتبعتلى تاج

بس مش أى تاج بقى... ده أغلس تاج شوفته من ساعة ما الموضة ديه ظهرت بيقولى أسامة(ساكاماكانيوز) أتكلمى عن خمس حاجات ما حدش يعرفها عنك... بقالى أهوه بتاع إسبوع مش لاقية حاجة أكتبها
قال يعنى بقى البت الواضحة اللى ما عندهاش حاجة مستخبية بس و لاهى يا أسامة مش فاهمة ..حاجات ما حدش يعرفها عنى ؟ها أفضح نفسى بقى ليه فجأة و أقولها المهم ياسيدى عشان خاطرك ها أحاول




أهم واحد: إن أنا اليومين دول بمر بمرحلة إنتقالية فى حياتى من أهم مراحل حياتى فعلاً بغير وضع عمرى ما كنت راضية عنه و مش عارفة شكل حياتى من غيره ها يبقى إيه عارفين لما يبقى بقالكوا سنبببببببببن متخيلين شكل معين للحياه اللى ها تعيشوها مرسوم جوة دماغكوا و فاكرين إن الإيام ها تلف تلف بس فى الآخر ها أعيش الحياة ديه أهو أنا اليومين دول إتمردت على الوضع اللى كنت بعيشه و اللى كنت فاكرة مش ها أعرف أعيش غيره

و ها أشوف بقى ها أنجح ولا لاْ




الحاجة التانية: أنا بحب القط بتاعى مووووووووووووووووووووووت

بحبه حب لا يمكن بجد أعرف أوصفهلكوا... بحس معاه بمشاعر الأمومة بكل ما تعنى الكلمة من معنى ...أول مرة شفته كنت راجعة من الجامعة و ماما إستقبلتنى على الباب و قالتلى مشمش فى الحمام روحى شوفيه.. فتحت باب الحمام و كان مشمش بياكل و مدينى ظهره ف ناديت قلت مشمش ف

إلتفتلى و باصلى....يا ربيييييييييييييييييييييييييييييييييى مش ممكن أعرف أوصف اللى حسيته فى اللحظة ديه

كمية حب غريبة.. كإن قلبى كدة إتفتح و مشمش ربع جواه ...المهم من يومها و أنا حاجات كتير بجد إتغيرت جوايا و حاجات ما كنتش متخيلة إنى ممكن أعملها فى حياتى بعملها عشان مشمش بغيرله الرمل و أأكله ب إيدى و أسيب باب الأوضة و أنا نايمة مفتوح عشان خاطر سيادته.. لو عاز حاجة بقومله فى عز الليل

بحبببببببببببه بقى أعمل إيه




الحاجة التالتة : غاضبة... شخصية غاضبة لأبعد الحدود... جوايا كمية غضب مش معقولة على واحدة فى سنى

أى موقف يحصل ينرفزنى بتصرف ب هدوء لحظى فى اللحظة اللى الموقف حصلى فيها و طول ما الشخص اللى منرفزنى واقف قدامى ببقى هااااااااادية و باااااااردة جداً لغاية ما الحد ده يمشى ..و بتبقى ديه أخر علاقتى مع الهدوء و الرزانة..بنفجر بقى من الغيظ و أقعد أجعجع و أعلى صوتى بحس إنى محتاجة دكتور نفسى يساعدنى على التخلص

من ال

anger and aggression




رابعاً: بما إننا ذكرنا موضوع الدكتور النفسى

بحس إنى محتاجاه عشان حاجات كتيييييييييير فى حياتى أنا عمرى ما طلعت اللى جوايا لأى حد مهما كان قريب منى...كل اللحظات المؤلمة و الحزينة تقريباً عشتها لوحدى إتعاملت معاها لوحدى تماماً من غير ما حد يحس إن فيه أى جديد حاصلى فى حياتى ...دايماً بعد الموقف ما يحصل و أتعامل معاه و يعدى بتاع نصه ..أبتدى أحكى و أقول بقى كل حاجة...نفسى مرة أزعل من حد ف أقولو ( ما تتكلمش معايا عشان أنا زعلانة) أو أتنرفز قوووووى على حد و أقول كلام ما أقصدهوش و أرجع أعتذر يعنى نفسى مرة أخرج عن شعورى زى كل الناس و أقول أى كلام إنفعالى و لحظى وما أبقاش مفكرة فيه




الحاجة الخمسة: هى ها يبقى ملخص عن شخصيتى اللى الناس اللى حواليا يعرفوه بس أكيد إنتوا لأ..أنا عندية جداً..و مخى عامل زى الجزمة القديمة الغير قابلة للنصح ..أحياناً ببقى عارفة إنى غلط و ما أعتذرش ..متطرفة فى مشاعرى يعنى لما بحب بحب قووووووووووووى و لما بكره بكره قووووووووووى...مخى كبير جداً و ما بزعلش بسهولة و لما أزعل بتصالح ب منتهى السهولة ...عندى ثقة فى نفسى و ف قدراتى زيادة عن اللزوم عايشة فى الحياة بمنطق

الأسد اللى بيدوس كدة و بعدين بتفاجأ بالنتائج


بس كدة هى ديه أنا

الفرق بينا نقطة

الفرق بين العرب والغرب نقطة

ها أديكوا أمثلة
يعني هم غرب بس إحنا عرب
والفرق بينا نقطة
هم بقوا شعب الله المختار ، و إحنا شعب الله
المحتار
والفرق بينا نقطة
هم بيفكرو باستغلال الشعوب و إحنا نفكر باستقلال
الشعوب
والفرق بينا نقطة
هم قدرو يعملو بين بعضهم تحالف ، بس إحنا عملنا
تخالف
والفرق بينا نقطة
هم عندهم المواطن وضعه مزبوط ، بس المواطن
عندنا مربوط
والفرق بينا نقطة
هم بيتفاهمو بلغة الحوار ، و إحنا بنتفاهم بلغة الخوار
والفرق بينا نقطة
هما مواطنون وصلوا لمرحلة الحصانة ، بينما إحنا في
مرحلة الحضانة
والفرق بينا نقطة
مع إنه إحنا اللي اخترعنا النقطة لما كانت صفر

BY THE WAY:

it's not my words it's just an email i got and i wanted to share it with you : )
i promised myself not to write about the political conditions for a while but i couldn't help myself when i got the mail from pulishing it because i really liked it and i thought it deserves to be puplished..

مقارنة

لىّ واحدة صاحبتى دايماً تقولى إن شخصيتى بتتغير حسب الشخص اللى أنا بتعامل معاه خاصةً لو الشخص ده كان راجل ...بتقولى إنى ببقى أهدى و أظرف و ردود أفعالى لما بغضب بتتغير
و كنت دايماً بأاااااااااااوح معاها و أقول إن أنا مش كدة
و أقولها إنتى فاهمة معنى كلامك ده إيه؟؟؟
معناه إنى منافقة
معناه أنى بوشين
و كانت دايماً تنتهى بينا المناقشة و أنا ما فيش أى حاجة ممكن تغير رأيى
لغاية ما كنت مرة فى موقف و أنا فى نص الموضوع إفتكرت فجأة كلامها و إكتشفت فعلاً إن ردود أفعالى بتتغير لما ببقى بتعمل مع رجالة....يعنى لما بتنرفز بتنرفز بحدود معينة ...و ما بشتمش أبدأً

على فكرة
أنا بتكلم عن عدد محدود من الناس
يعنى مش كل الرجالة بعاملهم كويس و لا كل الستات بعاملهم و حش
بس بذات فى الدايرة الصغيرة اللى حواليا من صحابى
إكتشفت فعلاً إن إسلوبى بيتغير من واحد لواحدة
و إكتشفت إن علاقتى بصحابى الولاد أقوى و أمتن من صداقتى مع البنات
و ركزت
فا إكتشفت إنى عموماً برتاح أكتر فى التعامل مع الرجالة
و أن فى المشروع إخترت جروب من صحابى الولاد
و عموماً مطربينى المفضلين.. رجالة
و الممثلين اللى بحبهم.. رجالة
و عرفت ليه بحب الرجالة أكتر
عشان الرجالة أوفى (أنا بتكلم عن الرجل كصديق) عشان طبعاً كل الصفات ديه بتختفى لما بيتحول لحبيب
نرجع لموضوعنا
أكتشفت إن الصداقة مع الرجل من أصدق و أرقى أنواع العلاقات الإنسانية
لما إتنين بيتفقوا إنهم أصحاب و بس
بتبقى العلاقة فيها رجولة و جدعنة و شهامة
بحب أوى الإسلوب الى بيعاملونى بيه
بحب إحساسى وسطهم
أكتر حاجة ببقى حريصة عليها فى صداقتى معاهم إنهم ما ينسوش و لا لحظة إن أنا بنت
يعنى فى كلام ما يتقلش و أنا موجودة و نكت كدة لازم تتقال بس و هما لوحدهم
فى الآخر إستسلمت لفكرة إنى بحبهم أكتر
و يمكن ده السبب إنى بعاملهم بطريقة مختلفة
نفاق بقى مش نفاق
أنا مش مضطرة أبرر


نيجى بقى للفقرة التانية
اللى هى تقريباً فى نفس الموضوع بس حسيت إن لازم يحصل فصل بين الفقرتين


رغم إنى بنت و بعتز جداً بكونى بنت فى مجتمع ذكورى بس عمرى ما طالبت بالمساواة بين الرجل و المرأة
دايماً مع إن الراجل راجل و الست ست ..لا الراجل
ممكن يبقى ست و لا يعرف يعمل عشر اللى ست تقدر عليه... و لا الست ممكن تسترجل و تطالب بالإمتيازات اللى بيتمتع بيها الرجل فى مجتمعنا ده
بحس إن تبديل الأدوار ده مش ممتع ..
بحس إن تميز الجنسين جاى من إنفراد كل منهم بإمتيازات خاصة هو بس اللى يقدر عليه
بحس إن الست بتكسب كتير من إظهار ضعفها و الراجل بيخسر كل حاجة لو ضعف فى لحظة
بشوف إن أجمل ما يميز الست هى حاجتها للراجل رغم قدرتها التامة على الإعتماد على نفسها و مواجهة الحياه
و أروع ما فى الرجل هو قوتة و قدرته على الإحتواء و حماية المرأه و تسهيل حياتها
ليه كل حد ما يحافظش على أجمل ما فى التانى و يحاول يبرزه
ليه الرجل ما يحترمش ضعف المرأة و يقدرة و ما يستغلهوش بالسيطرة و فرض القوة
و ليه المرأة ما تخترمش قوة الرجل
و تعترف بإنها محتاجة لحمايته؟

عارفة أن كل الستات ها ينتقدونى و يكرهوا فىّ أستسلامى لذكورية المجتمع
بس أنا مش مستسلمالها ولا حاجة ده أنا بعشقها...

سؤال؟

زهقت قووووى من الكلام فى السياسة و فى حال البلد اللى زى الزفت و فى الأوضاع المتردية اللى بتحيط بينا من كل ناحية
زهقت من إنى كل ما أدخل على أى مدونة ألاقى تقريباً المواضيع واحدة كلها كئيبة و تخنق و تقرف
زهقت من حالة الإحباط اللى عندنا كلنا
و زهقت أكتر من فكرة إن شوية شباب تتراوح أعمارهم من ال 20 ل ال 40 حتى شايفين الدنيا سودة أوى كدة
حاسة أنى عايزة شوية تغيير
شوية تفاؤل
أى حاجة كدة تخلينا نعرف نكمل
عايزة موجة أفلام هابطة
أو أغانى تافهة
أو أى عك كدة نرجع نشغل دماغنا بيه
مجنونة أنا؟؟؟ ولا بدور على حلول سهلة؟؟؟ ولا إيه بظبط؟

الحاجة

هى الحاجة أم التنازل ولا أم الإختراع؟؟؟
كل حاجة حوالينا بتقول إنها أم التنازل
طب ماشى
بس التنازل بيكون لغاية إيه؟؟؟
و عن إيه؟؟
أفضل أتنازل و أتنازل عشان محتاجة
؟؟
طب ما أنا ها أفضل طول عمرى محتاجة
كمان ها أفضل طول عمرى أتنازل؟؟؟

ما بين عراق صدام و عراق بوش

لا تأسفن على غدر الـــزمان لطالمــــا
رقصت على جثث الاسود كلاب
لا تحسبن برقصها تعلو على أسيادها
فـــــــالاســد أسد والكلاب كــلاب
تبـــقى الاســـود مخــيفــة في اســرها
حتــــى وإن نبحــت عليها كلاب


إمعاناً فى إذلالنا و التحقير من شأننا و أننا لا نملك من أمرنا شيئاً وأن لا فرق بيننا و بين الأضاحى تكاتفت كل من الحكومة الأمريكية بقيادة بوش و الشعب العراقى بتحطيم كل ما تبقى لنا من كرامة و شعور بالآدمية توحدت الرغبة الدموية لدى كلاً منهما فى إعطائنا صفعة جديدة على وجه كل عربى كان يأمل بيوم يكون لنا فيه من أمرنا شيئاً و تعلوا فيه كلمتنا لإتخاذ قراراتنا ,صفعة جديدة لتصطبغ الوجوه بحمرة الخجل و الألم و المهانة لحال العرب ف إختيار أول أيام عيد الأضحى المبارك لتنفيذ حكم الإعدام فى الرئيس الراحل (رحمه الله و رحم أمواتنا جميعاً) لم يكن إختيار عبثى بل كان آخر مشاهد المسرحية الهزلية لمحاكمة صدام ,مسرحية من إنتاج و إخراج الأمريكان و تمثيل العراقيين ف المحاكمة كانت عراقية و لكن بتخطيط أمريكى والحكم معروف حتى من قبل القبض على صدام و ميعاد تنفيذه معروف حتى قبل نطق القاضى بالحكم عرفته حين قال بوش أن إعدام صدام سيكون قبل حلول عام 2007
كل مشاهد المسرحية كانت مؤلمة وصولاً للصورة الأخيرة و جثة صدام معروضة على كا المحطات العربية و العالمية و هو غارق فى دمائه و ملتف بكفنه الأبيض و الذى فى الغالب كان مجرد شوال
ذهبت الروح الى خالقها لتحاكم محاكمة عادلة رحل و هو ينطق الشهادتين بصوت خفيض يعلو عليه صوت الخونة بالشماتة و الغدر هذه اللحظة المهيبة و ما تفجره من أحاسيس دامية و متألمة
لحظة خروج الروح لتقابل بارئها لم تثير فى مشاعر هذا الشعب الدموى و الغادر الخائن بطبعه سوى مشاعر الشماته و الفرح
لم أكن يوماً من المدافعين عن صدام و لم أرغب سوى فى محاكمة عادلة يحكم فيها القاضى بنفس الحكم (الإعدام) ليذوق من الكأس الذى تجرع منه معظم شعبه حتى أفراد أسرته الذين تعودوا على رؤية رؤوس من أحببوا مدلاه فوق مشانقهم بيد صدام , و لكن رغبت أن تكون محاكمة عادلة و يكون تنفيذ الحكم مقيد بالحدود الإنسانية و مراعاة تكريم النفس البشرية و هى بين يدى الله
ولن أنسى أن هذا الشعب الحيوانى واللذى تعود أن تقوده بالكرباج أختاروا الأمريكان بدل من نار صدام حسين ولنرى العراق بعد صدام
حسين(أدعوا الله أن يكون قد رزقة توبة قبل الموت) برؤية أمريكية
http://www.youtube.com/watch?v=eqPFxvQqJ20&mode=related&search=

سورررى يا جماعة: أنا لما شوفت الفيديو بتاع الإعدام ما لقتش إن صوته كان خفيض و لا حاجة و هو بيتلوا الشهادة
معلومة بس لتحرى الدقة
:)