03 January 2009

رجوع

واحشنى قوووووووووى البلوج و البلوجينج و واحشانى أكتر الكتابة و قراية التعليقات
عايزة أرجع تانى و مش عارفة و مش عايزة أرجع عشان جوايا كلام عايزة أقوله
أنا عايزة أرجع عشان فيه كلام نفسى أسمعه عايزة أرجع تانى ألاقى كومنتات من الناس اللى بيعدوا على البلوج و يسلموا
عايزة أتناقش
عايزة أقول كلام و يترد علىّ بكلام .. معايّ بقى أو ضدى مش فارقة.. المهم نكون موجودين .. كلنا موجودين بجد مفتقدة قوووووووى وجودى هنا .. الوقت اللى بطلت أكتب هو الوقت اللى بطلت فيه أقرى و قررت ما أسمعش و ما أشغلش دماغى
ريحت دماغى بس ده كان على حساب إحساسى بنفسى كا بنى آدمة بتتفاعل مع المجتمع و الأحداث اللى حواليها
أنا بحب البلوج ده قوى و بحب كل كلمة كتبتها هنا و كل كلمة إتكتبت فيه
هنا قلت الكلام اللى عايزة أقوله و الكلام اللى طلع لوحده من غير ما أكون عايزة أقوله
هنا حسيت بجد الناس اللى حواليا و عرفتهم و حبتهم
إتخلق مجتمع بتاعى أنا بس مع ناس إختارونى عشان نفسى مش عشان إتفرضت عليهم
هنا أنا
أنا اللى بحبها
هنا كل مشاعرى و ذكرياتى و إنفعلاتى
هنا زهقى و فرحى و قرفى و همى و مللى
و هنا برضه أسعد لحظات حياتى
عايزة أرجع تانى أقول و أسمع و أنفعل و أحس و الاٌقى الناس بتوعى حوالىّ
ده قرارى للسنة الجاية
إنى ارجع بنى آدمة
و حشتوووووووووووووووووووووونى قووووووووووووووى

4 comments:

الربان said...

تحياتي

اهلا و سهلا بك اختي الفاضلة....حمدا لله
علي عودتك.....

هنااخوة و اصدقاء لك....اكتبي حينماتشائين....و علقي حينما ترغبين
شاركي اخوتك و اصدقائك افراحك و افكارك و اتراحك....

مرة اخري اهلا بك....و مرحبا و عود حميد ان شاء الله.

abderrahman said...

حمدلله على السلامة يا يارا
انا رأيي اكتبي وخلاص، الكتابة نفسها هدف حتى لو الناس متفاعلتش
كفاية الواحد يشوف نفسه كل فترة زي ما انتي عملتي مع مدونتك هنا
welcome back
:)

yara said...

الربان :
ميرسى و إن شاء الله ها أحاول على قد ما أقدر إنى أقول اللى جوايا و اللى بقى كتيييير قوى بس هى الفكرة إنه بيبقى صعب تطلع اللى جواك لما تبقى بقالك كتييير بتحاول تكتمه

abdo basha :
ليك و حشة واحشنى البلوج بتاعك بشكل خاص و عايزة أرجع ألم كل اللى فاتنى فيه

كلام لوجيك said...

اختى العزيزة يارا
انا سعيد جدا بعودتك اللى تزامنت بدون قصد مع عودتى
وعاوز أقولك ان كل كلامك اللى قلتيه فى البوست بتاعك انا كمان حسيت بيه
وافتقد مجتمعنا الافتراضى وافتقد التواصل بين الناس وافتقدت النقاشات والاختلافات ومشاركة المشاعر والأفراح والأحزان والاستماع للرأي الاخر ونشر الوعى والانصهار فى المبادرات والحملات البلوجرية ومختلف الأنشطة اللى كانت فعلا بتعطينا نوع من القوة والثقة بالنفس والحماسه و غيرها من الأحاسيس الايجابية

مش عاوز أطول اكتر من كده
مرحبا بكى مرة اخري فى اسرتنا الكبيرة وسننتظر ابداعاتك ولمساتك

كل سنة وانتى طيبة

اسامة