جديد أحمد فؤاد نجم

نؤيد سيادتك لفترة جديدة
نكمل خلالها المسيرة السعيدة
و بالمرة فيها نبيع الحديدة
مفيش حاجة تانية نبيعها خلاص
نؤيد سيادتك لأجل المزيد
من اللي تحقق بفضلك أكيد
بقينا خلاص ع الحميد المجيد
و ربك لوحده فى ايده الخلاص
نبايع سيادته ولا حد غيره
كفايا علينا نبرطع في خيره
و نوم شعب مصر العظيمة و شخيره
يقول للحرامي ما تسرق كمان
نبايع سيادته وابنه وحفيده
مفيش زي فكره قديمه و جديده
خرابك يا مالطة حيحصل بايده
ومين فيكي يعن بيسمع آذان
نبوس ايد سيادتك و رجلك كمان
تخليك معانا يا ريس عشان
وجودك ضرورة فرضها الزمان
و من غير وجودك حقيقي نضيع
دي مصر بتاعتك و احنا ضيوفك
كفايا علينا يا ريس نشوفك
و عاذرين سيادتك و فاهمين ظروفك
عليك بس تؤمر و احنا نطيع
في جزمة سيادتك كلابك يبوسوا
و فوق الغلابة بجزمهم يدوسوا
و شعبك ليلاتي يا ريس غموسه
مذلة و مهانة و حوجة و مر
لكن يعني ما دمنا شعب انتساب
و دايما وأبدا فى حالة غياب
متعملش لينا يا ريس حساب
دي عزبة سيادتك و فيها أنت حر
و دستور ما دستورشى مش فارقة خالص
كلام فاضي كله يا فندم بناقص
كفايا علينا الفساد اللي ماصص
عرقنا و معشش و ضارب جذوره
و ايه يعني تهري جتتنا البلاوي
يوماتي كوارث، فضايح، رشاوي
كفايا علينا القعاد في القهاوي
بنستنى لما الوريث ييجي دوره

قرف

طب هو السؤال بقى و ب إختصار شديد قوى إحنا ف إيدينا إيه؟

ممكن نعمل إيه؟ إحنا الشباب الجيل الجديد عماد المستقبل زى ما بيقولوا

بدل الغضب و الغليان و البوستات الرافضة و المستهجنة للى بيحصل جوا و برة مصر و ف العالم العربى كله

ممكن نعمل إيه؟؟ حد يرد يقول نعمل إيه مظاهرات و بنعمل رفض و بنرفض إحتجاجات و بنحتج

حد يقول نعمل إيييييييييييه لو عايزين ناخد موقف إيجابى نعمل إيه ؟ إيه اللى ف إيدينا؟؟

عشان إتخنقت بقى من دور المتفرج الرافض اللاعن الغاضب اللى حاسس إنه لاحول له و لا قوة

إزاى نصحى ضماير الناس و إزاى نفوقهم نعمل إيه عشان نحس بهويتنا تانى المفقودة و نجدد نخوتنا

و نوحد كلمتنا نحس بمهاتنا و نثور لها إزاى نرفض بجد رفض إيجابى

حد يقول بقى حاجة تتعمل

عشان قرفتتتتتتتتت

رجوع

واحشنى قوووووووووى البلوج و البلوجينج و واحشانى أكتر الكتابة و قراية التعليقات
عايزة أرجع تانى و مش عارفة و مش عايزة أرجع عشان جوايا كلام عايزة أقوله
أنا عايزة أرجع عشان فيه كلام نفسى أسمعه عايزة أرجع تانى ألاقى كومنتات من الناس اللى بيعدوا على البلوج و يسلموا
عايزة أتناقش
عايزة أقول كلام و يترد علىّ بكلام .. معايّ بقى أو ضدى مش فارقة.. المهم نكون موجودين .. كلنا موجودين بجد مفتقدة قوووووووى وجودى هنا .. الوقت اللى بطلت أكتب هو الوقت اللى بطلت فيه أقرى و قررت ما أسمعش و ما أشغلش دماغى
ريحت دماغى بس ده كان على حساب إحساسى بنفسى كا بنى آدمة بتتفاعل مع المجتمع و الأحداث اللى حواليها
أنا بحب البلوج ده قوى و بحب كل كلمة كتبتها هنا و كل كلمة إتكتبت فيه
هنا قلت الكلام اللى عايزة أقوله و الكلام اللى طلع لوحده من غير ما أكون عايزة أقوله
هنا حسيت بجد الناس اللى حواليا و عرفتهم و حبتهم
إتخلق مجتمع بتاعى أنا بس مع ناس إختارونى عشان نفسى مش عشان إتفرضت عليهم
هنا أنا
أنا اللى بحبها
هنا كل مشاعرى و ذكرياتى و إنفعلاتى
هنا زهقى و فرحى و قرفى و همى و مللى
و هنا برضه أسعد لحظات حياتى
عايزة أرجع تانى أقول و أسمع و أنفعل و أحس و الاٌقى الناس بتوعى حوالىّ
ده قرارى للسنة الجاية
إنى ارجع بنى آدمة
و حشتوووووووووووووووووووووونى قووووووووووووووى