أوقات

مش عارفة ليه أنا مضايقة قوى كدة
أول ما إبتديت أقرأ المدونات كان دايماً فى قضية معينة شاغله الناس و كان كل المدونين المعروفين و اللى مش معروفين بيكتبوا فى السياسه أو فى القضايا اللى شاغلاهم فى الوقت ده بس كان دايماً كل واحد تجيله اللحظة اللى يكتب فيها عن نفسه
و كان ده دايماً مجمل الكلام
إن إحنا مضايقيين إن الحياه كئيبة إن كل حاجة سوداء فى عنينا
و تخيلت إن ده موود عامأ و إن ده حوار بيجذب الناس للبلوج عشان كده الكل بيكتب فيه
و ده اللى خلانى أتردد فى إنى أكتب إحساسى دلوقتى

هو إن أنا مضايقة قوى قوى قوى حاسة أنى مجروحة أو مكسورة حاسة إن فى حاجة أو إحساس مشروخ و بيوجع
و يمكن حاجات
أو يمكن أحاسيس
مش عارفة ليه بحس قوى كلمة الغدر و الخيانة ... بيلاقوا صدى جامد عندى

و الخيانة هنا ممكن تبقى خيانة وعود خيانة لحظات كنت فاكراها أصدق لحظات حياتى
مش عارفة ليه أغنية محمد فؤاد

أوقات يا دنيا معاكى بعيش و ساعات ما بفهمكيش وإنتى ولا فاهمانىأوقات بحس إن أنا مجروح عايش حلاوة روح و دمعتى محوطانى أوقات فى عز العتمة بشوف و ساعات بموت من الخوف و غصب عنى بدارى بحلم يعدى على الليل من غير عذاب ولا ويل و تحسى مرة بنارى أوقات بتاخدى أعز الناس و أقول نصيبه خلاص و أصبر على أحزانى أوقات بحب قلوب بتبيع وفى ألف لحظة بضيع و
برده مش حسانى

بحس كل حرف و كل كلمة فيها بحس إنه يقصدنى ... بيتكلم عنى ..... بيوصف أوجاعى
مش عارفة ليه أحياناً بعيط من غير سبب
مش عارفة ليه بسمح لنفسى و لأول مرة فى حياتى انى أعيش لحظة إنكسار
و أستسلم لها

حسبة برما

هو أنا اللى مجنونة ولا الدنيا هى اللى مجنونة و لا الزمن بقى عجيب و كل حاجة فيه بقت متوقعة أنا سمعت و بقول سمعت يعنى مش متأكدة أن وزير التعليم عامل شغل عالى قوى قوى قوى فى الوزارة و نازل طالع يقرر قرارات بس قرارات ايه بقى.. من النوع الجامد قال المعدين فى الكليات يفضلوا يعلوا فى السلم الوظيفى لغاية ما ياخدوا درجة الدكتوراه و بعديها بالسلامة يا يتعينوا يا ما يتعينوش كله حسب وزارة الداخلية لما تعمل تحرىو تشوف هو مناسب للمنصب و كفء فيه ولا لأ يعنى تأثيره على الطلبة ها يكون سلبى و لا ايجابى من الآخر يعنى (اخوانجى ولا لأ ..ضد الحكومة ولا مع النظام )ها يدخل فى عقول الطلبة اييييه
!!!!!!!!!!!!!!!!!!!!!!!!!!!!!!!!!!!!!!!
للدرجة ديه وصل القمع ومصادرة الحريات للدرجة ديه عايزيين يتحكموا حتى فى الكلمة اللى الناس بتفك بيها عن نفسها
و لو آه ووصلنا للدرجة ديه يبقى ايه الآخر و هانوصل لغاية فيين ما هو أى انحدار فى الآخر لازم بيوصل لقاع
أنا دلوقتى بتمنى ان يكون ده القاع
بتمنى انى أكون فى القاع
و بتمنى لكم انكو تكونوا فى القاع
يمكن ديه تبقى النهاية


على فكرة ديه أول مرة
practically
أكتب فيها فا عايزة أعرف بقى رأيوكو فى الاسلوب اكتب تانى ولا تبقى ديه المرة الأولى و الأخيرة